فيلم ثوري طويل

هذا المقال مقتبس عن موقع السورية المندسة لمشارك مندس لم يذكر اسمه ونزولا عند رغبتي الشخصية بالاحتفاظ بهذا المقال التحليلي الساخر الرائع وربما إيصاله للمزيد من القراء، قررت طلب نشره من الكاتب ولم يرد عليّ بعد لذا قررت سرقته ومنه السماح.

قبل ما بلش حكي…

عزيزي القارئ: قوم عميل كاسة شاي،شعلك سيجارة…سكرلي هالفيسبوك والجزيرة والسكايب بمعيتك…وعود لأحكيلك هالحكاية:

المربع:كائن ثنائي الأبعاد يعيش في المستوي.

المكعب:كائن ثلاثي الأبعاد يعيش في الفراغ

من هالتعريف البسيط نلاحظ أنو المكعب بيشبهنا كتير…باعتبارو عايش بالفراغ…فراغ سياسي فراغ اجتماعي فراغ عاطفي أو حتى روحي ما بيهمنا…

أما المربع فهو كائن ممسوح عايش ع المستوي…يعني متل الشفرة ع الارض مثلاً

هلأ من هون اسمحولي اتساءل…يا ترى نحنا شايفين هالوطن مربع لما مكعب؟

من عندي بلشت شوفو مكعب بل وبشده…مكعب مرسوم بالفراغ المؤلف من 3 محاور:

محور السينات: واللي فيه كل شي موالاة بغض النظر عن الدافع اللي خلاهن يصيروا موالاة،منهن اقليات عرقية أو طائفية،منهن أقليات طبقية (تجار الشام وحلب)،منهن أقليات أيديولوجية (جماعة الحزب القومي السوري الاجتماعي) ومنهن ناس لا تنتمي لكل ما ذكر سابقاً بس بيجمعن الخوف من المجهول…يعني عيشة الكلاب اللي بتعرفها أحسن من عيشة الكلاب اللي بتتعرف عليها…

وهاد المحور ما هو محور أحادي الطيف…يعني ازا موشرناه (مررناه عبر موشور) رح نشوف ألوان منحبك…مو بس ألوان،عمليا رح نشوف أشكال الوان:

الشكل الأول: منحبك متطرف،هدول الناس الأشد التصاقاً بالسلطة…وهنن الفئة المحرضة ع باقي الفئات..يعني هدول هنن يلي بيطلعوا الفنة تبع عزمي بشارة خاين ومنى واصف خاينة وكل واحد ما بيعبد صرماية بشار خاين…هدول اللي بيحذفوك من الفيسبوك بس ما بينسوا اسمك مشان يلعنوا سلافك لما يشوفوك وخاصة لما ترجع ع البلد…طبعاً بيبعتولك رسالة بتسم البدن قبل ما يحذفوك.

الشكل التاني: منحبك للعضم…هدول ناس الهن مصالح مع النظام،تجار وولاد تجار وصداقات مع النظام وعلاقات شخصية والذي منو…هدول ما بيحذفوك من الفيسبوك ولا بيخونوك لأنك رفيقون،بس بيحاولوا يعملو جهدن ما يقرو أي شي ضد النظام ولا يشوفوا اي فيديو للمجازر اللي عم تصير وغالباً ما بيفوتوا ع المندسة مشان ما تتسمم أفكارون…يعني عاملين حصار على ضميرون لانو مصالحون تقتضي أنو ما يندسوا.

الشكل التالت: منحبك يا كبيييير…هاد البني آدم غالباً انسان بسيط ومواطن شريف…بس ما بيقرا غير لما يكون عندو فحص وبعبارة أخرى ما بيعرف شي عن تاريخ سورية الحديث غير من كتب القومية،هلأ هاد البني آدم مصدق رواية النظام مع انو ممكن جدا يكون عم يسب ويكفر ع قناة الدنيا لأنو عم تستحمرو،وهاد المواطن كمان احتمال كبير يكون من أقلية دينية…يعني كل شي حواليه من اهل ورفقات وقرايبين عم يخوفوا ديانتو من السلفيين يلي بدون يقطعو راسو كما ظهر على التلفزيون…(بالفيديو الشهير يلي حطوه ع اساس أنو بسورية ونسيوا يشيلو الصوت لما بيقولو هكذا ستكون نهاية جيش المهدي الجبان…يعني الجحاش مشان تكمل روايتن لازم يقولوا صار عنا جيش المهدي بسوريا….عقبال الخمير الحمر انشالله)…

طبعاً منحبك يا كبير هو بني آدم مرشح ليصير مندس…بس بدو مين يفتحلو عيونو متل الخلق…ويفهموا أنو المواطن الشريف مو بس اللي بيآمن بنظريات الممانعة وبيحب رئيسو..المواطن الشريف كمان هو اللي بيحب بلدو…

الشكل الرابع: منحبك بس شو مشان؟ : هدول عالم عرفانة اللي عم يصير…بس مقتنعين انو سيادتو ما بيهون عليه هالشي وانو هي حالات فردية…يعني الف شهيد استشهدوا بألف حالة فردية،و10 تالاف معتقل اعتقلوا أيضاً بعشر تالاف حالة فردية…ما بعرف شو هو الرقم الحرج للحالات الفردية اللي بيخلي هدول العالم يفيقوا، غالباً هدول ما في منهن أمل لأنو المساحة الأكبر من تفكيرون بيشغلها الخوف ولا شيء آخر غير الخوف…طبعاً رفيقك ماركة منحبك بس شو مشان بيكون حاطط صورتو الشخصية ع الفيسبوك يعني لا صورة المعلم ولا أسود…بس بيكون مجاوب ع كم سؤال تبع هل توافق على أن يستمر الرئيس بشار؟ وخالع وحدة نعم بحال انكمش شي نهار وهو عم يشتري الفولات يوم الجمعة يفتحلون الفيسبوك للشباب ويورجيهن أنو هو منحبك وانو مشترك بالجيش السوري الالكتروني كمان.

محور العينات: وفيه ناس مع الثورة،ومع التغيير ولكن الدافع فيه شيء من التأثير الديني…يعني بالإضافة للظلم وغياب الدولة المسؤولة وانحصار مسؤولية الدولة بحماية الكرسي وحماية مصالح المستفيدين منها….هدول الناس عندن مفهوم ديني للحرية يعني بدهن اصلاحات وبدهن يطير هالنظام باللي فيه قشة لفة مشان يمارسوا حريتهن الدينية،والتي قد تؤدي ببعض أشكالها إلى التأثير على حرية الآخرين،أنا هون عم احكي عن المجتمع المتدين وليس المجتمع التكفيري السلفي الارهابي الموجود فقط على شاشة الدنيا…يعني تخيلوا مثلا يطلع قانون يمنع كل شي بارات بالبلد ويصير عليه تصويت سواء جماهيري أو من خلال مجلس شعب منتخب غالبية اعضاؤو متدينين…ساعتها بدي شد ع بيروت كل ما اجا ع بالي اشرب كاسة عرق…وهاد شي قابل جداً للحدوث إذا سقط النظام وصارت انتخابات نيابية نزيهة ورح اعطيكن مثال عن اللي صار بفلسطين…مع انو فلسطين فيها وحدة من اقوى الحركات اليسارية بالعالم العربي،اللي ربح الانتخابات كانت حماس! طبعاً حماس مرتبطة ارتباطاً وثيقاً بالاخوان المسلمين.

طيب شو هدول الاخوان المسلمين؟ هلأ يلي بدو التفاصيل يتفضل يزورنا بالويكيبيديا…. واللي بدو الزبدة، الإخوان هي حركة تمثل الاسلام السياسي..يعني الجماعة بدهن يصير حكم بالشريعة الاسلامية، ما بدهن يقتلوا “الكفار” بس بدهن يحكموهن متل ما كان عمر بن الخطاب يحكم المسيحية واليهود ع وقتو…مواطنين درجة تانية +ضربة منية أنو مستحملينهن بالدولة الاسلامية الرشيدة.

طيب عندنا إخوان بسورية؟

هلأ انا شخصياً عايش كل عمري بسورية وما بعرف حدا منظم بتنظيم الاخوان..ولكن قيادات الاخوان الموجودين بلندن (الشقفة والبيانوني) بيدعوا انو الن زلمن بسورية…ومنطقياً في ناس من المتدينين خاصة يلي عندن طموح سياسي ممكن يحطوا خبزاتن ع جبنات البيانوني ويصير للاخوان المسلمين وجود ع الارض بسورية..كتنظيم سياسي وليس كميليشيات مسلحة.

وهيك بيكون صار عندكن فكرة عن محور العينات.

محور الصادات: هلأ هاد المحور المتعامد مع المحورين السابقين بالفراغ…هاد بيضم الناس اللي ضد النظام،واللي ما بتتفق ايديولوجيا مع الاخوان بنفس الوقت…يعني هاد المحور فيه كل شي يساريين ولادينيين ثوريين وفيه كتير عالم معتدلة دينيا (من كل الاديان والطوائف) بس بترفض فكرة الاسلام السياسي وبترفض فكرة امتطاء الدين للوصول للسلطة…يعني باختصار هاد هو المحور الثوري العلماني.

طيب ع هالحكي كل محور متعامد مع المحورين التانيات…يعني كل مجموعة عندها (خصمين) سياسيين،صح؟

أي نعم يا فتح…بلشت تفهم ع ربي

يعني النظام مو بس ضد الاخونجية كما يدعي…وإنما ضد العلمانيين الثوريين والدليل الاعتقالات اللي صارت لكتير شيوعيين وعلمانيين سواء مؤخرا خلال الأحداث أو قبل ذلك…يعني لا حدا يقلي إعلان دمشق مثلا جماعة سلفية مسلحة…ولا حدا يقول انو ميشيل كيلو كان عم يدور ع سكينة بالمطبخ وعم يصيح ع الجهاد قبل ما تسلمو خالتي أم ميشيل للسلطات المختصة.

طيب والاخوان ضد العلمانيين الثوريين؟؟

حالياً لأ…بوجود بعبع النظام الكل خرسان وما عم يفتح تمو…لا هدول عم ينقرو ع هدول ولا هدول عم ينقرو ع هدول…يعني انا اليوم شخيت ضحك لما شفت فداء السيد حاطط ع صفحة الثورة أنو حرائر سورية عم تستغيث الله الله يا حرائر سورية…وحاطط تحت هالكلمة صورة رفيقة شيوعية معتقلة (تهامة معروف)…أنو لما يقول حرائر بتخيل وحدة لابسة برقع!

هلأ ما كتب أعلاه هو نظرية المكعب مع برهانها…

أما أخونا خالد العبود اللي بكالوريتو أدبية ومو سمعان بالهندسة الفراغية وعايش كل عمرو بمستوي (بيجوز كمان يكون عايش بالمستقيم) فهاد الزلمة يرى الوطن كمربع ضمن مستوي فيه محورين:محور منحبك ومحور العصابات المسلحة والتكفيريين…

————————————————————————-

طيب،إذا سقط النظام شو رح يصير بجماعة منحبك؟ومين رح يكون اقوى محور العينات لما محور الصادات؟؟

مبدأياً جماعة منحبك بأطيافها المختلفة رح تتوزع على 3 موديلات:

1.ناس خارج الملعب السياسي…هنن الأسماء اللي اسمها متوسخ بشدة بالفساد وتتضمن العيلة المالكة حالياً…يعني ما بتخيل رامي مخلوف رح يأسس حزب مثلا ويمارس العمل السياسي لانو يا رح يكون محبوس يا هربان برات البلد…نفس الحكي ينطبق على محمد حمشو صاحب قناة الدنيا وغيرهن…ومن لف لفهم…يعني المهربين والزعران والشبيحة ما رح يشكلوا حزب التهريب والدخان الديمقراطي مثلا..أو حزب القناصين الأحرار.

2.ناس ما بتفهم بالسياسة ولا بالرياسة ع قولة معلمنا زعيم الثورة أبو نظير الله يفك أسرو…هدول رح يكونوا خارج المعادلة جزئياً…يعني ما رح يمارسوا السياسة بشكل فاعل من خلال تشكيل الأحزاب وإنما بشكل منفعل من خلال انتخاب ممثلين لهم،هلأ مين رح ينتخبوا ما بعرف بس ما بتخيل ينتخبوا أحزاب لها خلفيات دينية…أساساً لازم خلال الفترة الانتقالية تطلع قوانين تمنع تشكيل أي أحزاب على أسس دينية او عرقية…يعني مثلا حزب بس للمسملين أو حزب بس للأكراد…لانو هي الشغلات بتأذي مفهوم المواطنة والدولة المدنية…بس مع ذلك رح يكون في أحزاب مدنية ظاهرياً ولكن اغلب اعضاءها وقياداتها عندن فكر ديني…المهم الفئة الثانية غالباً رح تكون أصواتها موزعة وإذا في أحزاب وسط رح تكون اصوات هالفئة عند أحزاب الوسط.

3.جماعة منحبك للعضم (واللي عندن رؤوس أموال قوية) : رح يحاولوا يأسسوا أحزاب وسط ويمارسوا العمل السياسي بهدف الحفاظ على مكاسبن…طبعاً هاد حق مشروع ضمن دولة القانون،ولما يكون في رقابة ع الكل مافي مشكلة ولا في خوف انو الطبقة البورجوازية تسرقنا او تحصل على امتيازات من فوق الاساطيح….اصلا ما رح يكون في شي فوق الاساطيح غير الستالايت وخزان المي…القناص بيكون عم يلعب كاونتر…

4.منحبك يا كبييير: هاد الزلمة ممكن جدا يستميلوه جماعة القومي السوري…من خلال شعاراتون الطنانة الرنانة يعني ازا ما انتسب الهون رح يصوت الهون،القومي السوري أخطر من حزب البعث ومن الإخوان مجتمعين…واللي مو مصدقني يروح يقرأ لانطون سعادة…وبعد ما يخلص قراءة يغمض عيونو ويتخيل سعادة رئيس جمهورية…ويترحم على 60 صدام حسين وشي 17 حافظ اسد…بس من حقهون الوجود كحزب سياسي والمساهمة بالحراك السياسي بها البلد ضمن قانون يضمن حقوق الجميع…وبغض النظر عن افكارن اليمينية فيهن ناس فهمانة.

5.منحبك بس شو منشان؟: هدول الجماعة بعد ما ياخدو نفس ويفيقوا من الصدمة ويسمعوا الخبر ع قناة الدنيا انو سقط النظام….ويشوفوه ع اليوتيوب ويقروه بجرايد 70 دولة…رح يبلشو يتخبطوا…ومهمة الفئات اللي عندها وعي سياسي انو تفهمون وين الله حاططون خاصة أنو هالفئة عددها مو قليل…

6.طيب المعارضة المتدينة الحالية: رح ينضم إلها حدا من جماعة منحبك؟؟؟له يا معلم ولو…مولانا البوطي وكل شي في قبيسيات..بعد ما يتيتموا بعد حزب البعث رح يروحوا يتمسحوا بالإخوان!

هلأ نفس الكلام اللي قلناه عن القوميين السوريين ينطبق على المتدينين…من الضروري الغاء فكرة الاحزاب الدينية كأحزاب قائمة على فكر ديني ومحتكرة من قبل طائفة أو دين معين،ولكن مافينا نحرم مواطن او مجموعة مواطنين من ممارسة العمل السياسي لانهن بيصلوا او الهن دقن….

العمى يعني رئيسنا الجاية اسمو فداء السيد؟؟؟

لك أبي فداء السيد اجا هيك حسب نظرية الاحتمالات…ضربت معو الزلمة لأنو أول واحد عمل صفحة للثورة السورية وبلشت العالم عندو تكتر…بـ15 آذار كان عندو 30 الف واليوم صاروا شي 175 الف…

فداء السيد كل اللي عم يعملوا انو عم يستقبل الفيديوهات تبع الاحداث والمظاهرات،عم يحط عليهون الله الله يا شباب درعا،الله الله يا حرائر دوما…إلخ هالكم كلمة اللي حافظن،وعم ينشر…فداء السيد لا يتعدى كونه قناة اعلامية عم تتطلع الناس على اخبار الثورة من خلالو،يعني مثلا ازا بيطلع فداء السيد بكرة الصبح بيقول منحبك بتخلص الثورة شي؟؟؟الجواب لأ!! فإذا لا فداء ولا غيرو الو دور قيادي بالثورة..وفي كتير صفحات للثورة ع فكرة محتواها علماني صرف،وحدة منهن اسمها الحرية لشعب سورية،نستحق العيش بكرامة..والشب اللي عاملها مسيحي عايش باميركا وفيها شي 25 الف راس…بس فداء ضرب معو الحظ كونو أول واحد عمل صفحة والناس صارت تبعتلو الفيديوهات…الله يعطيه العافية بكرة بعد الثورة منعملو حفل تكريم ومنتشكرو…

هلأ هاد كل شي براسي حالياً…أصلا طولت عليكون وإذا في أي نقد أو تصحيح أو وجهة نظر على الموضوع انا رح كون متابع التعليقات…مرة تانية شكراً لقراءة هالنص الطويل…والثورة مكملة…واللي خايف من انتكاسة طالبانية بعد الثورة بقلو…اول باشتان طالبان ما عملت اللي عملو هالنظام…تانياً اللي عمل ثورة بيعملها ثورتين…كرمال تصير سورية وطن ما تتمنى تهاجر منو أول ما تاخد شهادتك الجامعية….

والخلود لنضالنا المندس

رابط المقال: http://www.the-syrian.com/?p=2908#comment-1069

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s